Idrettens e-sportstand på Play!Expo under Play!Festival i Grieghallen 2025. Foto: Grethe Hillestad
Os Aero Klubb og primus motor Ingebjørn Aasheim stilte med eitt av sine seglfly, tre flysimulatorar og godt med medlemmar gjennom heile helga slik at alle som kom innom standen fekk god rettleiing, prøve simulatorane med og utan VR-briller og kunne prøvesitte seglflyet.
Thomas Nilsen frå Os Aero Klubb forklarar org.sjef i Vestland idrettskrets Randi Marie B. Farnes korleis ho styrer seglflyet med simulator og VR-briller. Foto: Grethe Hillestad
I tillegg til flysimulatorar kunne publikum prøve fleire andre idrettssimulerande spel. Kalandseid IL lånte ut sin racingstol med alt utstyr og rigga dette opp til ein fast spelstasjon slik at den var tilgjengeleg heile helga for alle som ville prøve. Bergen Skateboardklubb var representert med to ulike spel som aktive skatarar brukar blant anna når dei skal lære inn nye triks. Gimle Basketballklubb hjelpte med basketspelet 2K og Nore Neset IL stilte med folk på stand til rettleiing og informasjon. Publikum kunne i tillegg til dette prøve ulike idrettar på Nintendo.
På idrettens e-sportstand kunne dei besøkande prøve racingstol, skatespill, basketspillet 2K og ulike idrettsspill på nintendo. Foto: Grethe Hillestad
Vi fekk også denne helga vist fram fysiske e-sportar, eller E-idrett. Syklistar frå Cykleklubben Sotra, Epronex, Fana IL og Åsane Cykle Klubb stilte med fullt utstyr og eit planlagt ritt på Swift og sykla dette rittet på standen vår! Tusen takk for at de var med og gjorde standen levande.
Syklistane etter vel gjennomført sykkelritt på Swift. Foto: Grethe Hillestad
På standen ved sida av Idrettens e-sport kunne ein også prøve ut VR Taekwondo som er ei offisiell konkurransegrein. I AdO Arena blei det for første gong i Noreg gjennomført eit komplett Indoor Triatlon med både verdsstjerner og yngre utøvarar som er på veg opp og fram. Les meir om saka her. Spesiell takk til Geir Iden, Åsane Cykle Klubb som fekk dette og sykkelrittet på standen i stand!
Grethe Hillestad og Randi Marie B. Farnes, Vestland idrettskrets i kollegial og digital taekwondokamp. Foto: Petter Hylland
Triatlonutøvarane visast som avatarar når dei sit på sykkelen og spring på tredemølle på bassengkanten. Foto: Grethe Hillestad
I samband med Play!Festival arrangerte også idrettskretsen møte med idrettslag i fylket som har tilbod om dataspeling og e-sportaktivitet, saman med Bergen kommune, E-sportforbundet og Norges idrettsforbund.