Narvik-regionen har lenge hatt eit stort og aukande behov for meir innandørs fotballkapasitet. Dagens fasilitet er sprengt – og både breidde og toppfotball etterspør nye og framtidsretta løysingar.
Styreleiar i Nordland Idrettskrets, Reinert Aarseth, var til stede i Narvik 10.12 for å dele ut pengene og understreka at tildelinga er ei viktig investering for heile regionen.
– Vi ser eit tydeleg behov for minst éin stor innandørs fotballhall i Narvik-området. Dette er to sterke initiativ som no får midlar til å gjennomføre gode, grundige planprosessar før viktige val skal takast, seier Aarseth.
To prosjekt – eitt felles regionalt behov
Bjerkvik IF arbeider med planane om ein stor, framtidsretta flerbrukshall på eiga tomt i Bjerkvik. Her skal både fotballen og fleire andre idrettar kunne få plass, med moglegheiter for mellom anna friidrett, klatring, styrke, kampsport og skyting. Prosjektet har brei lokal forankring, og Forsvaret sit i styringsgruppa som ein viktig samarbeidspartnar. Planane inkluderer også ei unik moglegheit for å utnytte overskotsenergi frå det planlagde datasenteret i nærområdet – noko som kan gi ein svært miljøvennleg og kostnadseffektiv hall.
FK Mjølner får samstundes støtte til ei ny moglegheitsstudie i samarbeid med Narvik kommune og Nordland fylkeskommune. Arbeidet er knytt til planane for ny vidaregåande skule og vurdering av ei stor, heilskapleg halløsning på stadionområdet.
– Når to klubbar jobbar parallelt, er det ekstra viktig at ein ser løysingar i samanheng. Vi forventar og ønskjer eit tett samarbeid mellom klubbane, idrettsråd, kommune, fylkeskommune og særkretser framover, seier Aarseth.
Nordland Idrettskrets meiner no at føresetnadene ligg godt til rette for at regionen på sikt kan få minst éin storhall med regional funksjon – ei etterlengta løysing både for Narvik, Ofoten og Nord-regionen av Nordland og Sør-Troms.
Ein milepæl for framtidig idrettsutvikling
Under utdelinga uttrykte både Mjølner og Bjerkvik stor takksemd for midlane. For idrettskretsen handlar støtta om meir enn kroner:
– Ein storhall for fotball er ikkje berre ein hall – det er ei plass å høyre til, året rundt, ei møteplass og eit viktig verktøy for folkehelse, inkludering og bulyst, sa Aarseth då han overrekte tildelingane.
Han roste samtidig engasjementet i regionen og understreka at eit sterkt lokalt initiativ er ein av dei viktigaste suksessfaktorane for framtidig anleggsutvikling.
Fire prosjekt fekk støtte hausten 2025
Gjennom hausten har Nordland Idrettskrets fordelt prosjektmidlar frå Anleggsfondet til fire klubbar:
- FK Mjølner
- Bjerkvik IF
- Nedre Beiarn IL
- Hemnes IL
Midla skal gå til kostnadskrevjande prosjektering – den fasen som ofte er avgjerande for om anlegg faktisk blir realisert.
Om Anleggsfondet
Anleggsfondet er Nordland Idrettskrets sitt eige fond for støtte til prosjektering av nye idrettsanlegg. Fondet blir finansiert gjennom Samfunnsløftet SpareBank 1 Nord-Norge, og er eit samarbeid mellom idrettskretsane i Nord-Noreg.
Sidan starten har fondet bidrege med om lag 6,2 millionar kroner fordelt på rundt 85 anleggsprosjekt i Nordland.
Målet er å sikre gode anleggsprosessar, med fokus på både behovs- og interessanalysar, prosjekt-grunnlag, konkretisere og velge konsept før ein starter bygging av anlegga.
